Медициналық сақтандыру - сән-салтанат па, әлде қажеттілік пе?

Қазақстанда ерікті медициналық сақтандыру (ЕМС) — сән-салтанат емес, қажеттілік. Өкінішке қарай, тегін медицина іс жүзінде не мүлдем тегін болмай шығады, не толыққанды медицина болмайды. Блогосферада «тегін» медициналық қызмет туралы жүздеген наразы әңгімелерді табуға болады: онда медбикелерге әр екпе үшін, ал дәрігерлерге әр тексеру үшін «алғыс білдіру» керек.

Осыған байланысты қазақстандықтардың барған сайын көбі (әрине, әзірге олардың басым бөлігі — ірі қалалардың тұрғындары) ерікті медициналық сақтандыру полисі үшін бір рет ақы төлеп, қандай медициналық көмекті және қандай көлемде ала алатынын нақты білгенді жөн көреді.

Алайда ЕМС полисін таңдау оңай емес. Оны сатып алмас бұрын мүмкіндігінше көп ұсынысты мұқият талдау қажет. Бірақ алғашқы ондағанынан кейін-ақ қол жуып кеткің келеді: бюджеттік нұсқалар мүлдем дені сау адамдарға есептелген. Сақтандырылғысы келетіндер арасында мұндай адамдар өте аз, ал шарт жасасып, ЕМС сатып алғысы келген адам олардың қатарына жатпайтыны анық болғандықтан, бәрібір баға мен сапа арасындағы ымыраны іздеуге тура келеді.

Қазақстанда базалық қызметтерді қамтитын ЕМС полисінің құны — бірнеше ондаған мың теңге. Жақсы бейінді клиникалардағы емдеу құнын жабатын, дәрігерді үйге шақыруды, стационарға шұғыл жатқызуды, стоматологиялық қызмет көрсетуді, сондай-ақ коммерциялық жедел жәрдемді қамтитын ЕМС сізге 85 мың теңгеден кем түспейді. Әрі оған бірқатар мамандардың қабылдауларының санына шектеулер, сондай-ақ түрлі талдаулардың, рәсімдер мен зерттеулердің қатаң белгіленген саны енгізілуі әбден мүмкін. Олардың кейбірін, оның ішінде ең қымбаттарын, сізге сақтандыру компаниясымен келісуге тура келуі ықтимал. Көптеген шектеулер көзделген мұндай ұсыныстарға кез келген дерлік сақтандыру компаниясында тап боласыз.

Айтпақшы, ЕМС-ті бір компаниядан «көтерме» сатып алсаңыз, үнемдеуге болады. Он-он бес адамнан тұратын топтарға (бұл шамамен үш отбасы) жеңілдік жасалуы әбден мүмкін, сондай-ақ шартты заңды тұлғаға ресімдеуге болады, өйткені компаниялардың көпшілігі жеке тұлғаларды сақтандырудан бас тартты.

Дегенмен мамандар қауымдастық тізіліміндегі сақтандыру брокерлері мен агенттеріне кеңес алу үшін жүгінуді ұсынады.