Экспорттаушыларға арналған банктік кепілдіктерді сақтандыру
19 қараша 2011 Оқу: 2 мин Қаралымдар: 1 467
«КазЭкспортГарант» АҚ экспорттаушылар үшін қаржылық қолдаудың жаңа құралын іске қосты
«КазЭкспортГарант» АҚ экспорттаушылар үшін қаржылық қолдаудың жаңа құралын — «Банктік төлем кепілдіктерін сақтандыруды» іске қосты, деп хабарлайды ҚР Индустрия және жаңа технологиялар министрлігінің баспасөз қызметі.
«Мұндай кепілдіктер ретінде коммерциялық банктер экспорттаушылардың сұрауы бойынша шығаратын аванстық төлемді қайтару кепілдіктері, тендерлік кепілдіктер және міндеттемелерді орындау кепілдіктері бола алады», — делінген баспасөз қызметі таратқан хабарламада.
Ведомствоның ақпараты бойынша экспорттаушылар арасында бұл құралға шетелде құрылыс-монтаж жұмыстарын жүргізетін және банктік кепілдік қызметтерін тұрақты пайдаланатын компаниялар барынша қызығушылық танытуда. «Бұл құрал тамақ және химия салалары сияқты экономиканың басқа секторларындағы экспорттаушылар үшін де кем пайдалы емес», — деп нақтылайды ведомствода.
ҚР Индустрия және жаңа технологиялар министрлігінің деректері бойынша бұл құрал өнімдер мен қызметтерді жеткізу жөніндегі міндеттемелер бойынша экспорттаушыларға кепілдіктер шығару туралы банктердің шешім қабылдау процесін жеделдетеді. «Енді экспорттаушыларға өз қаражатын «мұздатудың» қажеті жоқ және кредит желісін басқа өндірістік мақсаттарға босатуға мүмкіндік бар. Осы қызметті пайдалана отырып, экспорттаушылар өз тапсырыс берушілеріне сыртқы экономикалық келісімшарт бойынша міндеттемелердің толық орындалуына кепілдік береді», — деп атап өтілген министрліктің баспасөз релизінде.
Ведомствода хабарлағандай, жаңа құрал сондай-ақ шетелдік тапсырыс берушілер өткізетін тендерлер мен конкурстарда отандық экспорттаушы кәсіпорындардың бәсекеге қабілеттілігін арттыруға ықпал етеді.
«Бұл қызметті «КазЭкспортГарант» АҚ отандық кәсіпорындарға қызмет көрсететін коммерциялық банктер арқылы көрсететін болады, бұл да мәміле құнының төмендеуіне және шешімдердің жедел қабылдануына ықпал етеді», — деп хабарлайды ҚР Индустрия және жаңа технологиялар министрлігінің баспасөз қызметі.
